स्पेनमा भएको साँढे दौड प्रतियोगितामा वर्षोनी कुनै न कुनै दुखद घटना भएकै हुन्छन् । साँडे दौडमा सहभागी हुने मान्छेहरु मध्ये केहीले त ज्यान नै गुमाउँछन् भने घाइते हुनेको त गणना नै हुँदैन । स्पनेमा अहिले चलिरहेको साँढे दौड पर्वका बेला एक जना मान्छेलाई मत्त साँढेले सिङमा उन्यो, नराम्ररी उधिन्यो, घाउ नै घाउ बनाइदियो र रगतले लत्पताइदियो । धन्न उद्धारकर्ताहरु आएर ती मान्छेलाई साँढेको पञ्जाबाट फुत्काए र उनको ज्यान बँच्यो ।

रिसले मत्त साँढेले ती मान्छेलाई सिङमा उधिनेर आकाशमा उफार्यो अनि जमिनमा पछारिएपछि उनको सुरुवाललाई समेत सिङले तल झार्दै मज्जाले ती व्यक्तिको सरीरमा सिङ गाड्न थाल्यो । स्पेनको पाम्पलोनामा चलिरहेको सन फर्मिन पर्वका अवसरमा छैटौँ दिनको साँढे दौडका बेला यो घटना भएको हो । साँढे दौडको छैटौँ दिन एक अमेरिकी र अर्का एक स्पेनी नागरिक पनि साँढेको आक्रमणमा घाइते भए ।