काधको जोर्नी दुख्ने समस्या प्रायलाई  हुने रोग हो । एक वा दुवै काँधको जोर्नीमा दुखाइ एकसाथ वा पालैपालो आउन सक्छ । यो समस्याले कतिपयलाई जटिल अवस्थासम्म पनि पुर्याउँछ । काँधको जोर्नी दुखाइको समस्यामा काँध र वरपरको भाग सुन्निने, अररो हुने, हात चलाउन वा हातले गर्नुपर्ने काम गर्न कठिनाइ हुने, गर्दन, टाउकोलगायत पिठ्यूँमा पनि दुखाइ हुनेजस्ता लक्षणहरू देखा पर्न सक्छन् । कतिपयलाई हात माथि उठाउन र हात हल्लाएर हिँड्न, सुत्न, नुहाउन, लेख्न, कम्प्युटर चलाउन, एक–दुई किलोग्राम तौल उठाउन पनि गाह्रो हुन्छ ।

दुख्नुको कारण र त्यसको असर
शरीरको सबैभन्दा चलायमान जोर्नीहरूमध्ये काँधको जोर्नी पनि एक हो । अझ खेलकुद गर्दा, दौडँदा बल पर्ने काम गर्दा  र शारीरिक स्थिति गडबडीको अवस्थामा यसमा बढी बल पर्छ । कुनै कामको बोझ, चोटपटक वा कुनै रोगले काँधको जोर्नीमा असर परेमा त्यहाँको हाड–जोर्नी सुन्निने वा संक्रमण हुने, टेन्डन (मांसपेशीसूत्र) तथा लिगामेन्टहरू च्यातिने वा संक्रमण हुने, छाला तथा मांसपेशी बन्धन वा पेशीसूत्रभित्र हुने तरलयुक्त मसिना थैलाहरू सुन्निने भएमा समेत काँधको जोर्नी र वरपर समस्या देखिन्छ ।